Të premten e javës së kaluar, kryeministri i Kosovës, Albin Kurti, ka marrë pjesë në përurimin e rrugës “Adem Demaçi” në Çair të Shkupit. Vizita e Kurtit ka ngjallur reagime të shumta në Maqedoninë e Veriut.
Në kuadër të këtyre reagimeve, sot kryetarja e qytetit të Shkupit, Danella Arsovska, në Këshillin e Qytetit të Shkupit ka dorëzuar iniciativën për rikthimin e emrit të rrugës “Brigada e dytë maqedonase”, që tashmë mbart emrin e veprimtarit të njohur kosovar, Adem Demaçi.
“U bëj thirrje të gjithë këshilltarëve në Këshillin e Qytetit të Shkupit që të votojnë për këtë propozim vendim, me të cilin do të korrigjohet padrejtësia ndaj 230 heronjve, pjesëtarëve të “Brigadës së Dytë Maqedonase” të të gjitha etnive që dhanë jetën për mbrojtjen e Maqedonisë. Apeloj që kjo iniciativë të mos politizohet apo keqpërdoret për ngritjen e tensioneve etnike, sidomos për faktin se shumica e heronjve, përveç maqedonasve, ishin edhe shqiptarë, romë dhe vllehë”, thotë Arsovska.
Tutje, Arsovska ka kritikuar edhe vizitën e kryeministrit Kurti, duke shtuar një propozim për komunën e Prishtinës.
“Në të njëjtën kohë dënojmë, ashpër retorikën nacionaliste të kryeministrit të Kosovës, Albin Kurti, dhe dua t’i propozoj atij një iniciativë të re – emërtimin e një rruge në Prishtinë me emrin e revolucionarit maqedonas Todor Aleksandrov, i cili dikur në mënyrë aktive bashkëpunoi me Hasan Prishtinën, Azem Bejtën dhe Bajram Curin në luftën kundër pushtimit të SKS-së. Për këtë bashkëpunim është marrë vendim nga Komiteti Qendror i OBRM-së, në të cilin person kontaktues është caktuar Petar Çaulev”, theksoi Arsovska.
