Kryetari i Partisë Demokratike, Memli Krasniqi, ka uruar shqiptarët në prag të 28 Nëntorit, 110-vjetorit të shpalljes së pavarësisë së Shqipërisë.
Krasniqi përmes një postimi në Facebook, ka falënderuar shqiptarët të cilët me rezistencë dhe sakrificë jetësuan aspiratat shekullore.
“Sot, në Tiranë, në mbledhjen e parë të përbashkët të dy Kuvendeve tona, në vigjilje të një feste shumë të rëndësishme kombëtare. Sot, bashkë, kujtojmë dhe nderojmë heronjtë e kënduar dhe të pakënduar nga dy shtetet tona, të cilët me guximin, ëndrrën dhe vizionin e tyre mundësuan këtë ditë”, ka shkruar Krasniqi.
Sipas tij, amaneti dhe pesha e përbashkimit ndër ne vjen nga Skënderbeu, përcillet te Ismail Qemaili e ndizet përsëri në Prekaz, te Adem Jashari dhe UÇK-ja.
“Kjo flakë shekullore, që ngrohë e ndriçon vazhdimisht zemrat, mendjet dhe rrugët tona, le të jetë udhërrëfyes i përjetshëm i kombit tonë drejt unitetit e suksesit. Urime shqiptarë”, përfundoi Krasniqi.
