Shefi i Grupit parlamentar të PDK-së, Memli Krasniqi, ka folur edhe për taksën e vendosur ndaj Serbisë, për të cilën bashkësia ndërkombëtare po kërkon me ngulmë që të hiqet.

Në pyetjen e  analistëve në Debat Plus, nëse PDK  do ta heqë taksën, po apo jo, ai ka thënë se nuk është në kuiz  të përgjigjet me mohim ose pohim.   

“Taksa s’ka mu e u heqë  kurrë,  ka me u suspendu ndoshta me një moment por me u heqë jo. Kur e kemi vendosë këtë tarifë është vendosë si mjet me e kundërshtua Serbinë në agresionin diplomatik ndaj Kosovës mes tjerash, por fatkeqësisht taksën e kanë kthy në qëllim, Haradinaj e ka kthy në qëllim dhe këtu është gabimi esencial,”ka vlerësuar Krasniqi.

Ai më tutje ka theksuar se për PDK-në,  partneriteti me aleatët është më i rëndësishëm se sa përfitimet momentale ose në një cikël zgjedhor.

“Nëse PDK vjen në pushtet ne në asnjë mënyrë nuk e rrezikojmë raportin me SHBA-të por as me BE-në” tha Krasniqi.

Por analistët kanë insistuar në përgjigje konkrete nëse PDK do ta heqë taksën nëse vije në pushtet, insistim ky që e tensionoi Krasniqin.  

“Taksa s’ka me u heqë, mos boni kuiz o burrë, kuiz jeni tu dashtë me bo,” ka përfunduar Krasniqi./Sinjali/