Ndonëse tashmë ekzistojnë vendet adekuate për hedhjen e mbeturinave, ato po vazhdojnë të mbesin problematike për kryeqytetin, shkruan Gazeta Sinjali.
Me një problem të tillë po ballafaqohen edhe banorët e një ndërtese në rrugën “Luan Haradinaj” në Prishtinë.
Banorët e kanë njoftuar Sinjalin se bashkërisht e kanë caktuar një pjesë të ndërtesës që ta shfrytëzojnë si depo të mbeturinave.
Kjo hapësirë pasi është modifikuar nga banorët, është prishur nga Komuna e Prishtinës nën arsyetimin se ajo është pronë publike.
E njëjta hapësirë tashmë gjendet përplot me mbeturina, por jo nga banorët e ndërtesës, por nga qytetarët kalimtarë.
“Kjo hapësirë është ndreq prej banorëve që të përdoret si depo e mbeturinave, por komuna u ardhë e ka prish e na ka thanë që është hapësirë publike e duhet me liru”, tha njëri nga banorët.
Ky banor i tha Sinjalit se bërlloku i mbledhur aty po iu shkakton shumë probleme, sidomos aroma e keqe që mbizotëron.
Gazeta Sinjali ka dërguar pyetje edhe në adresë të komunës së Prishtinës, por deri në publikimin e lajmit, të njëjtit nuk kanë kthyer përgjigje.
