Qendra e Lëvizjes Vetëvendosje në Prishtinë ka realizuar një aksion te objekti i Komunës së Prishtinës pas blerjes së disa kontejnerëve nga Serbia.
Ata kanë vendosur disa kontejnerë në oborrin tek komuna bashkë me afishet për bojkotimin e produkteve serbe me moton “Bojkotoni prodhimet e Serbisë”.
Në njoftimin e LVV-s Qendra e Prishtinës thuhet se në kuadër të fushatës për bojkotimin e prodhimeve të Serbisë, Rinia e Lëvizjes në Prishtinë, solli tek Komuna e Prishtinës kontejnerët e blerë nga Serbia në vlerë prej 48 mijë e 389 euro.
“Kështu i rikujtojmë edhe ekzekutivit komunal, por jo vetëm, se edhe institucionet duhet të bashkëngjiten në thirrjen qytetare për bojkotimin e këtyre produkteve serbe”, thuhet në njofitmin e LVV-së.
Më tej në njoftim thuhet se Serbia vazhdon jo vetëm të mos e njoh Kosovën, por ta luftojë Republikën tonë çdo ditë.
“E më e pakta që mund të bëjmë secili nga ne, është t’i bojkotojmë këto produkte” thuhet në njoftimin e VV-së.
