Prokuroria Themelore në Prizren ka paraqitur kërkesën për caktimin e masës së paraburgimit ndaj Egzon Reshanit, të riut që u ndalua për 48 orë pasi dyshohet për të shtëna me kallash në një lokal në Prizren, raporton Gazeta Sinjali.
Këtë e ka bërë të ditur për Gazetën Sinjali zëdhënësja e Prokurorisë, Fitore Mehmeti e cila ka thënë se ekziston dyshimi i bazuar se Reshani ka kryer veprat penale “Mbajtja në pronësi, kontroll ose posedim të paautorizuar të armëve”, “Përdorimi i armës apo mjetit të rrezikshëm” dhe “Shkaktimi i rrezikut të përgjithshëm”.
Reshani ishte shpallur në kërkim nga 11 maji, kur dyshohet se me armë automatike ka shtënë disa herë në një lokal.
I ndaluari për këtë rast është emër i njohur për organet e drejtësisë me një të kaluar kriminale të konfirmuar nga Gjykata.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
