Kandidatët republikanë për president që konkurrojnë për të qenë alternativa kryesore ndaj kandidatit kryesor Donald Trump, debatuan për çështjen e mbështetjes së Amerikës për Ukrainën që nga pushtimi i Rusisë.
Si guvernatori i Floridës, Ron DeSantis, ashtu edhe sipërmarrësi i teknologjisë, Vivek Ramaswamy, thanë se kundërshtojnë financimet e tepërta për Ukrainën, duke argumentuar se paratë duhet të shpenzohen për sigurimin e kufirit të SHBA-së kundër trafikut të drogës dhe njerëzve.
“Si president i Shteteve të Bashkuara, detyrimi juaj i parë është të mbroni vendin tonë dhe popullin e tij”, tha DeSantis.
Ramaswamy e krahasoi mbështetjen për Ukrainën me ndërhyrjet fatkeqe ushtarake të SHBA-së në Irak dhe Vietnam.
Guvernatori i Nju Xhersit, Chris Christie, ish-zëvendëspresidenti Mike Pence dhe ish-ambasadorja e OKB-së, Nikki Haley e cilësuan mbështetjen për Ukrainën si një detyrim moral dhe një imperativ të sigurisë kombëtare, duke paralajmëruar se presidenti rus Vladimir Putin do të vazhdojë agresionin e tij nëse ai ka sukses në Ukrainë, duke kërcënuar potencialisht Aleatët e SHBA.
