Juventusi po përgatitet për një lëvizje të madhe në tregun e transferimeve, pas një sezoni që nuk i ka përmbushur pritjet e klubit.
Sipas raportimeve të “Gazzetta dello Sport”, drejtuesi Damien Comolli ka vendosur që katër prej përforcimeve kryesore të verës së vitit 2025 të nxirren në shitje, si pjesë e ristrukturimit të skuadrës për sezonin e ardhshëm.
Mes emrave që mund të largohen përmendet edhe futbollisti kosovar Edon Zhegrova, për të cilin Juventusi po shqyrton opsionin e huazimit, me qëllim rritjen e vlerës së tij në treg, pasi një shitje e menjëhershme vlerësohet më e vështirë në aspektin financiar. Në të njëjtën listë të lojtarëve që mund të largohen përfshihen edhe Joao Mario dhe Lois Openda.
Ndërkohë, situata e Jonathan David paraqitet më e thjeshtë, pasi sulmuesi kanadez, i ardhur si lojtar i lirë nga Lille, mund të shitet për rreth 25 milionë euro. Sipas mediave italiane, disa klube nga Anglia dhe Franca tashmë kanë shfaqur interesim për të.
Raporti i “Gazzetta dello Sport” e konsideron merkaton e verës së kaluar si të pasuksesshme për Juventusin, ndërsa drejtuesit e klubit po punojnë për të korrigjuar gabimet dhe për të ndërtuar një skuadër më konkurruese në sezonin e ardhshëm.
Sinjali – aty ku e vërteta flet para lajmit!
