Kryetari i Lidhjes Demokratike të Kosovës, Isa Mustafa, thotë se në Bruksel me Serbinë po dialogohet për njohje reciproke bazuar në platformën e Qeverisë Hoti, por sipas tij, këtë qasje nuk e ka Serbia.

I pari i LDK-së thotë se Serbia po provokon marrëveshjen e arritur në Washington dhe e cilëson si një eskalim të ri të Serbisë.

“Në Bruksel po dialogohet për njohje reciproke bazuar në Platformën e Qeverisë, të cilën e ndjek kryeministri Hoti. Kjo është qasja e Kosovës. Por po duket se kjo nuk është qasja e Serbisë”, thotë Mustafa.

“Qeveria e Serbisë u betua gjatë zgjedhjes së saj se do ta ruajë ‘Kosovën dhe Metohinë’. Nuk ka pasur reagime të BE-së për këtë veprim që është edhe provokim për dialogun. Është provokim edhe për Marrëveshjen e Washingtonit. Është një eskalim i ri i Serbisë, i cili vë në pikëpyetje konstruktivitetin e tyre në procesin e dialogut”, tha Mustafa për RTV21.

Ai shtoi se Serbia po e akuzon Kosovën për mosimplementim të Asociacionit, por Serbia nuk po tregon se janë me dhjetëra marrëveshje qe i ka nënshkruar dhe nuk i ka zbatuar./Gazeta Sinjali/