Shantazhet që bëhen përmes rrjeteve sociale janë raste të shpeshta në vendin tonë. Zakonisht viktima janë vajzat e reja të cilat në këmbim të mospublikimit të pamjeve që do cenonin integritetin dhe privatësinë e tyre, detyrohen të kryejnë favore të ndryshme ndaj të dyshuarve, raporton Gazeta Sinjali.
Për një rast të tillë që dyshohet se ka ndodhur në Prishtinë, ka nisur hetimet Prokuroria.
Burimet e Gazetës Sinjali kanë bërë me dije se një 22-vjeçare ka denoncuar në Polici ish të dashurin e saj, për të cilin thotë se fotografitë intime që i kishin bërë bashkë derisa ishin në lidhje dashurie, ua ka dërguar familjarëve dhe shoqërisë së saj.
Sinjali mëson se motivi që shtyu 23-vjeçarin që të bëjë këtë veprim, është puna të cilën kishte nisur ta kryente viktima në një lokal ku ofrohen shërbime për masazh.
Si rezultat i denoncimit, i dyshuari është shoqëruar në stacion policor për intervistim dhe ndaj tij është iniciuar rasti ‘Fotografimi dhe incizimet tjera të paautorizuar’.
Me urdhër të prokurorit, i riu është dërguar në mbajtje për 48 orë.
