Kryetari në detyrë i PDK-së Enver Hoxhaj, po e konsideron Presidenten Vjosa Osmani të varur nga Kryeministri Albin Kurti.

Hoxhaj në Rubikon tha se kjo madje ishte njëra ndër aryset pse PDK-ja mori vendim të mos mbështeste zgjedhjen e saj për presidente, njofton Klan Kosova.

“Nuk ka qenë qëndrim i imi personal. Nuk ka qenë qasje personale në raport me Vjosa Osmanin. Ka qenë vendim në përputhje me partinë e brendshme. Kemi diskutuar në këshill drejtues të PDK-së e më pas edhe në Kryesi të PDK-së. Ne e shohim dhe e kemi parë Vjosa Osmanin si të varur politikisht nga Albin Kurti. Pse e varur nga Kurti? Pse është e varur nga Albin Kurti – mendoj se e ka treguar edhe pas zgjedhjeve”, u shpreh ai.

Tutje Hoxhaj ka folur për ish-deputeten e kësaj partie, e cila tashmë ka aderuar në Lëvizjen Vetëvendosje, Adelina Grainca.

Ai thotë se kanë qenë të sigurt se Grainca nuk do të marrë pjesë në votim.

“Vota e Granicës nuk ka qenë votë parimore, ka qenë më shumë rezultat i pazarave e jo parimeve. Ajo duhet ta kthejë mandatin PDK-së. Deri në minutën e fundit na është thënë se ajo nuk do të votojë se është i pavërtet lajmi se ajo do të votojë. Në ditën kur është votuar kemi pas disa informata dhe jemi munduar ta menaxhojmë situatën dhe jemi munduar që të mos ndodh dhe jemi kon të sigurt që s’do të ndodh pastaj papritmas e kemi parë në sallë”, u shpreh Hoxhaj.

Ai madje thotë se Grainca nuk është temë jetike për PDK-në.

“Nuk është temë aq jetike për PDK-së sa që sot i humbim 5-6 minuta. E kam pyetur cilin komision dëshiron të shkosh dhe i kam ofruar mbështetje”, shtoi Hoxhaj./Gazeta Sinjali/