Përfaqësues të Odës së Afarizmit të Kosovës sot zhvilluan një takim me kryeministrin e Kosovës, Avdullah Hoti dhe zëvendëskryeministrin, Driton Selamanaj. Qëllimi i këtij takimi, OAK njofton se është gjendja e rëndë e të bërit biznes, mospërkrahja e bizneseve nga ana e shtetit dhe nevoja emergjente për përkrahje të bizneseve, shkruan Gazeta Sinjali.
“Gjatë këtij takimi përfaqësuesit e OAK-së së bashku me kryeminstrin biseduan për detajet e pakos së rimëkëmbjes ekonomike, propozimet që oda ka përgatitur në konsultim me bizneset që përfaqëson, pengesat gjatë operimit, ngecjet në zhvillimin ekonomik, mungesa e ofertave për të bërë biznes për investitorët, operimi me vështirësi si rezultat i pandemisë dhe larg planifikimeve të bëra, si dhe rëndësia e ruajtjes së likuiditetit dhe ofrimi i përkrahjes për punëtorët”, thuhet në njoftimin e OAK-së.
Oda e Afarizmit bën të ditur se në këtë periudhë pandemike disa nga nevojat emergjente të biznesit janë qasja në financa, subvencionimi i normave të interesit, shtyerja e kësteve të kredive pa interes dhe tatimeve edhe për tre muaj të tjerë, subvencionimi i pagave të punëtorëve, subvencionimi i qirave si dhe ofrimi i kredive për bizneset me grejsperiudhë deri në dy vjet, si disa nga masat mëse të nevojshme për tejkalimin e kësaj periudhe më të cilën po ballafaqohemi.
Ndërkaq, nënkryetari i OAK-së, Arsim Selmonmusaj, citohet të ketë folur për pikën 15 të vendimit të Qeverisë të miratuar në mbledhjen e 9-të për ndërprerjen e aktivitetit në sektorin e identifikuar të institucioneve përkatëse të listuar sipas gjurmimit aktiv epidemiologjik, duke kërkuar ndryshimin e kësaj pike, meqë sipas tij, ky vendim është vështirë i realizueshëm dhe do të dëmtojë biznesin në nivel shumë të lartë.
Disa nga propozimet e OAK-së për pakon e rimëkëmbjes e të cilat u shpalosën në takim përfshijnë: vazhdimi i subvencionimit të pagave të punëtorëve dhe qirave deri në fund të muajit shtator, përkrahja e prodhuesve vendor me subvencionim prej 10 % duke krijuar arkën patriot, subvencionimin e eksportit me 10 % të shumës, ulja e normës së interesit nga BQK që do të ndikonte edhe në ulje të interesit nga Bankat Komerciale, garantimi i kredive për bizneset duke alokuar 300 milionë euro në fondin për garanci kreditore, ulja e tvsh-së në turizëm dhe hotileri në 5 % etj.
Kryeministri Hoti gjatë këtij takimi ka propozuar që përfaqësuesit e bizneseve të jenë pjesë e komisioneve vlerësuese të masave për mbështetje të tejkalimit të situatës së krijuar nga pandemia.
“Kryeministri Hoti falënderoi përfaqësuesit e OAK-së për kontributin e vazhdueshëm në fuqizimin e tregut të punës në Kosovë, duke u shprehur i hapur për të dëgjuar problemet e bizneseve dhe shqyrtuar se në çfarë masa mund të ofrojnë mbështetje, duke theksuar edhe mundësitë e kufizuara që kanë. Hoti veçoi rëndësinë e bashkëpunimit reciprok duke ftuar përfaqësuesit e bizneseve për të qenë pjesë e komisioneve vlerësuese të masave për mbështetje në mënyrë që situata aktuale të përballohet sa më lehtë”, thuhet tutje në kumtesë.
Në këtë takim Oda e Afarizmit u përfaqësua nga Skënder Krasniqi kryetar i bordit, Arsim Selmonmusaj nënkryetar i bordit, Diamant Elshani sekretar i bordit, Hamdi Malushaj anëtar i bordit dhe Qendresa Ibrahimi koordinatore në OAK.
Ndërsa Kryeministri Avdullah Hoti ishte i shoqëruar nga zëvendëskryeminstri Driton Selmanaj dhe Këshilltari Gazmend Qorraj./Gazeta Sinjali/
