Vendimi i Gjykatës Kushtetuese për rrëzimin e Qeverisë Hoti ka bërë që partitë politike të fillojnë jozyrtarisht fushatën e tyre zgjedhore nëpër komuna të ndryshme të Kosovës, shkruan Gazeta Sinjali.

Kreu i Aleancës për Ardhmërinë e Kosovës, Ramush Haradinaj, ka publikuar disa fotografi nga vizita e tij e sotme në fshatin Zabel të Epërm të Komunës së Drenasit ku shihen se nuk po i respektojnë masat anti-COVID.

Në postimin e Haradinajt shihen afërsisht 40 persona të grumbulluar, të cilët nuk e respektojnë distancën fizike dhe nuk bartin maskat.

“I nderuar sonte me mikpritjen e z. Bedri Hajdini dhe banorëve të Zabelit të Epërm. Bashkëbiseduam për hallet e përbashkëta dhe shpalosa planet e Aleancës për mbijetesë, rimëkëmbje dhe zhvillim. U garantova se Aleanca gjithmonë do të vazhdojë të qëndrojë afër njerëzve të këtij vendi me të gjithë kapacitetin dhe energjinë e saj!”, shkroi Haradinaj në Facebook.

Kujtojmë që kjo nuk është hera e parë që kandidati për presidentit i shpallur nga AAK ka thyer masat antiCOVID të vendosura nga qeveria, Gazeta Sinjali ka raportuar në vazhdimësi për shkeljen e këtyre vendimeve nga Haradinaj./Gazeta Sinjali/