Ministrja e Punëve të Jashtme dhe Diasporës, Meliza Haradinaj-Stublla, ka ftuar për vizitë në Kosovë princeshën arabe, Doaa Bint Muhhamad, raporton Gazeta Sinjali.

Kjo ftesë u bë pas nënshkrimit të kontratës mes Komunës së Prishtinës dhe Autoritetit Arab të Gruas për ndërtimin e qendrës për diagnostikimin e kancerit të gjirit dhe kujdesit shëndetësor të gruas në Prishtinë, kontratë e cila u vlerësua lart nga kryediplomatja e Kosovës.

“Ky donacion, që kap vlerën rreth një milion dollar, paraqet fillimin e bashkëpunimit me Autoritetin e Gruas Arabe, që përfshinë 22 organizata të grave të vendeve të ndryshme arabe, me seli në Dubai. Autoriteti i Gruas Arabe, që udhëhiqet nga Princesha Doaa Bint Muhhamad nga Arabia Saudite, ka si vizion që të jetë promotore e ekselencës së gruas arabe në shkencë dhe arsim, si dhe të arrijë partneritet ndërkombëtarë në zhvillim”, thuhet në njoftimin e ministrisë.

Andaj, shefja e diplomacisë kosovare e ka falënderuar princeshën arabe, duke e ftuar që të vijë për vizitë në Kosovë.

“Në këtë frymë, në cilësinë e ministres së Punëve të Jashtme dhe Diasporës e kam falënderuar Princeshën Doaa për përzgjedhjen e Kosovës për bashkëpunim dhe njëherësh e kam ftuar të vizitojë Kosovën, vizitë kjo që shumë shpejtë pritet të realizohet”, citohet të ketë thënë Haradinaj-Stublla./Gazeta Sinjali/