Ish-kryeministri i Turqisë dhe bashkëpunëtori i ngushtë disavjeçar i presidentit Erdogan, Ahmet Davutoglu ka thënë dorëheqje sot nga Partia për Drejtësi dhe Zhvillim.

Ai tha se e ka në plan ta formojë një lëvizje të re politike.

Davutoglu njoftoi për dorëheqjen disa ditë pasi partia nisi procedurat për përjashtimin e tij dhe të tre ish-ligjvënësve të tjerë për, siç thuhet, shkelje të disiplinës.

Davutoglu ka shërbyer si ministër i Jashtëm i Turqisë nga viti 2009 deri më 2014, ndërsa më pas si kryeministër deri më 2016, kur edhe është shkarkuar nga Erdogani dhe zëvendësuar nga Binali Yildirim.

Kohëve e fundit, ai ka qenë kritik ndaj politikave të Erdoganit, veçanërisht në lidhje me lirinë e shprehjes.

Davutoglu është njeriu i dytë më i rëndësishëm i Partisë për Drejtësi dhe Zhvillim që jep dorëheqje.

Në muajin korrik, edhe ish-zëvendëskryeministri Ali Babacan është larguar, duke bërë publike planet për formimin e një partie të re.

Erdogan i ka paralajmëruar anëtarët e partisë së tij se “ata që zbresin nga treni, nuk do të lejohen të kthehen më”.