Presidenti turk Rexhep Tayip Erdogan, u ka dërguar sot një ultimatum kurdëve sirianë që të dorëzojnë armët gjatë  natës, ndërsa fliste para grupit parlamentar të Partisë Drejtësi dhe Zhvillim (AKP).

Presidenti i Turqisë, i cili po nxitet nga kombet perëndimore të ndalojë ofensivën që ka filluar në Siri, përjashtoi çdo negociatë me forcat kurde të mërkurën.

Ai kërkoi që armët të depozitoheshin dhe të tërhiqen nga kufiri me Turqinë.

“Disa drejtues përpiqen të ndërmjetësojnë. Nuk ka ndodhur në historinë e Republikës Turke, që të ulet në të njëjtën tryezë me një organizatë terroriste, “tha fillimisht Erdogan, duke shtuar:” Ne nuk kërkojmë një ndërmjetës, nuk kemi nevojë për të. Propozimi ynë është si vijon: Menjëherë, sonte (16/10), të gjithë terroristët do të hedhin armët dhe pajisjet e tyre, të shkatërrojnë të gjitha fortifikimet e tyre dhe të tërhiqen nga zona e sigurisë që kemi ngritur “.

“Kur të keni bërë këtë, nga Manbiji deri në kufirin me Irakun, atëherë operacioni ynë” Burimi i Paqes “, i cili ka për qëllim vetëm terroristët, do të përfundojë,” tha ai.

Në të njëjtën kohë, ai sulmoi ata që “fajësojnë Turqinë për genocid “.

“Nëse doni të shihni masakra të civilëve, hidhni një vështrim në Qipro përpara se Turqia të përfshihet, hidhini një sy Palestinës – e cila shtrihet nën hundën tuaj – ku myslimanët po vriten në rrugë,” tha presidenti turk, sipas mediave turke.

“Turqia nuk është duke luftuar sirianët por brutalitetin terrorist që po u shkaktohet atyre”, shtoi ai, duke argumentuar se forcat turke në Siri nuk synojnë kishat, madje edhe kur “terroristët i përdorin ato si një strehë”.

Për më tepër, presidenti turk tha se që nga fillimi i operacioneve në Siri, forcat turke kanë “pastruar” 1.220 kilometra katrorë të pushtuar nga terroristët.