Gjykata Themelore në Gjilan, sot ka pranuar kërkesën e Prokurorisë duke i caktuar masën e paraburgimit prej 30 ditësh, të pandehurit Sh.S.

Dyshimet ndaj të pandehurit Sh.S., janë se me datë 26.07.2020, në ora 23:00, në shtëpinë e përbashkët, i pandehuri me dashje ka ushtruar dhunë ndaj bashkëshortes së tij duke i shkaktuar lëndime trupore.

“Sh.S., ka kanosur me fjalë të ndryshme, gjithashtu ushtron edhe dhunë, ashtu që e kap për kyçi të dorës, duke i shkaktuar edhe lëndime trupore”, thuhet në njoftimin e Gjykatës.

Sipas njoftimit të Gjykatës Themelore në Gjilan, me këto veprime i pandehuri dyshohet të ketë kryer veprën penale “dhunë në familje” vepër e sanksionuar me Kodin Penal të Republikës së Kosovës (KPRK).

“Gjyqtari i procedurës paraprake në Departamentin e Përgjithshëm, pas shqyrtimit të shkresave të lëndës, ka konsideruar se janë përmbushur kushtet ligjore për caktimin e masës së paraburgimit ndaj të pandehurit, pasi që caktimi i masave tjera alternative do të ishin të pamjaftueshme për zhvillimin normal të procedurës penale dhe për të parandaluar ndikimin tek e dëmtuara apo përsëritja e veprës penale’, thuhet në njoftimin e Gjykatës./ Gazeta Sinjali/