Dy persona janë vrarë me armë zjarri në qytetin qendror kenian Nanyuki, gjatë protestave kundër planeve të SHBA-së për të hapur një qendër izolimi për Ebola në një bazë ushtarake aty pranë, ka mësuar BBC.
Njëri nga viktimat u qëllua në një zonë pranë Bazës Ajrore Laikipia, ku po zhvillohej një demonstratë. Ai vdiq pasi u dërgua në spitalin e qytetit nga miqtë e tij.
Viktima tjetër ishte tashmë e vdekur kur u dërgua në spital nga ushtarët.
Rrethanat e vdekjes së tyre nuk janë ende të qarta, ndërsa autoritetet nuk kanë dhënë koment zyrtar për rastin. Një zëdhënës i policisë për agjencinë Reuters tha se nuk ishte në dijeni për asnjë viktimë.
Të hënën, qindra protestues marshuan nëpër rrugët e qytetit, duke bllokuar rrugët dhe duke djegur goma, ndërsa policia përdori gaz lotsjellës për t’i shpërndarë, raporton BBC, transmeton Sinjali.
Njëri nga të vrarët është identifikuar nga familja si Charles Mang’aro Mwangi. Ata thonë se 27-vjeçari nuk ishte i përfshirë në protesta dhe po kryente aktivitetet e tij të përditshme kur u qëllua.
“Ai po shkonte të takonte një mik për pak kohë” rreth orës 18:00, pasi ishte kthyer nga puna, ka thënë nëna e tij Joyce Wangari.
“Ai nuk ishte pjesë e protestave. Nuk mbante gurë dhe nuk po i hidhte asgjë policisë. Ai ishte thjesht në rrugë, duke u marrë me punët e tij kur u qëllua,” ka shtuar ajo.
Familja e Mwangi-t thotë se nuk ka marrë asnjë komunikim nga policia lidhur me rrethanat e vdekjes së tij.
Sinjali – aty ku e vërteta flet para lajmit!
