Franca ka raportuar rastin e saj të parë të Ebolës gjatë shpërthimit më të fundit të sëmundjes, pasi një mjek që ishte kthyer nga Republika Demokratike e Kongos (DRC) doli pozitiv në test.
Mjeku kishte qenë në një mision humanitar, ka bërë të ditur Ministria e Shëndetësisë e Francës. Pacienti është izoluar dhe autoritetet po kryejnë gjurmimin e kontakteve, duke shtuar se rreziku për popullatën e përgjithshme evropiane mbetet i ulët.
OBSH ka deklaruar se shpërthimi i Ebolës në DRC ka numrin më të madh të rasteve të konfirmuara brenda muajit të parë të çdo episodi të sëmundjes.
Numri i rasteve të konfirmuara në DRC është rritur në 1,094, përfshirë 277 vdekje, sipas të dhënave qeveritare të së martës. Shpërthimi aktual është shkaktuar nga virusi Bundibugyo. Ai është zbuluar me vonesë dhe ekspertët thonë se virusi ka qarkulluar për muaj të tërë para se shpërthimi të shpallej zyrtarisht më 15 maj.
Gjurmimi i kontakteve mbetet një problem kyç për autoritetet lokale, të cilat kanë arritur vetëm 55% mbulim, ka bërë të ditur Ministria e Shëndetësisë së DRC-së.
Abdirahman Mahamud nga OBSH tha në një konferencë në Gjenevë se një nga arsyet e përhapjes së madhe të shpërthimit është fakti se disa raste të hershme janë regjistruar në zona urbane, si Bunia dhe qyteti minerar Mongbwalu.
Shpërthimet e mëparshme shpesh kanë nisur në zona rurale dhe janë shuar më shpejt.
“Ajo që është e rëndësishme është se duhet ta përshkallëzojmë reagimin, pasi ky shpërthim po lëviz më shpejt se ne”, tha ai për gazetarët, pas kthimit nga Bunia javën e kaluar.
Dy shpërthimet më të mëdha të mëparshme të Ebolës kanë qenë ai në Afrikën Perëndimore (Guine, Sierra Leone dhe Liberi), ku kanë vdekur 11,325 persona midis viteve 2014–2016, dhe një tjetër në DRC në vitin 2018, me 2,299 viktima.
Ndërkohë, një shtetas amerikan i trajtuar për Ebola në Gjermani është liruar nga spitali më herët këtë muaj, pasi nuk është detektuar më prania e virusit që nga 30 maji.
Sinjali – aty ku e vërteta flet para lajmit!
