Mbrëmë pak para mesnatës, polici, Fatlum Mehmeti dyshohet se qëlloi aksidentalisht me armë zjarri kolegun e tij, Lirim Haxhollin, i cili u dërgua në Emergjencën e QKUK-së, por pavarësisht përpjekjeve të mjekëve, ai fatkeqësisht nuk arriti t’u bëjë ballë plagëve dhe vdiq, shkruan Gazeta Sinjali.

Pas vdekjes së Haxhollit kanë reaguar familjarët e tij, të cilët kanë bërë të ditur se varrimi do të bëhet në varrezat e kryeqytetit në Dragodan.

Ndërkohë, motra e Haxhollit ka shkruar një postim prekës në profilin e saj në Facebook, ku ka thënë se “O shpirti jem, o drita e syve te mi ma këpute shpirtin. Pusho në paqe!”.

“Me pikëllim lajmërojmë miqtë dhe dashamirët që në moshën 27-vjeçare, pas një incidenti tragjik, ndërroi jetë më i dashuri dhe më i shtrenjti jonë Lirim Idriz Haxholli!”, thuhet tutje në postimin e saj.

Motra e tij ka bërë të ditur se varrimi bëhet në prezencë dhe përcjellje të familjes, miqve, kolegëve dhe dashamirëve nesër në orën 15:00.

Ngjarja dyshohet se ka ndodhur gjatë një feste, ku kishin marrë pjesë rreth 15 zyrtarë policorë në një villë në Zllatar të Prishtinës.

I dyshuari për vrasjen e viktimës, Fatlum Mehmeti u ndalua për 48-orë dhe u suspendua nga detyra.

Përveç Fatlum Mehmetit, IPK ka arrestuar edhe 5 zyrtarë të tjerë policorë, të cilët janë suspenduar, po ashtu IPK ka bërë të ditur se i ka rekomanduar Policisë së Kosovës masën e suspendimit edhe për 9 zyrtarët tjerë policorë që ishin prezent në këtë rast.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata. /GazetaSinjali/