Gazeta Sinjali gjatë javës së kaluar ka raportuar për një incident që ka ndodhur në lokalin ‘Indica’ në rrugën ‘B’ në Prishtinë, ku dy punëtorët e stafit, Qerim Istrefaj dhe Besart Povataj dyshohen se për motive ende të panjohura, kanë sulmuar fizikisht dy klientë. Povataj ishte arrestuar menjëherë nga Policia, ndërsa Istrefaj ishte arratisur nga vendi i ngjarjes.
Burimet e Gazetës Sinjali kanë bërë me dije se Istrefaj gjatë ditës së sotme është paraqitur në stacion policor, ku është intervistuar në praninë e avokatit të tij mbrojtës.
Me urdhër të prokurorit, ndaj tij është iniciuar rasti ‘Lëndim i lehtë trupor’ dhe i njëjti është ndaluar për 48 orë.
Kujtojmë se rasti është denoncuar nga dy të rinj, të moshës 19 dhe 24-vjeçare, të cilët kanë raportuar në Polici se janë sulmuar nga stafi i këtij lokali dhe si pasojë e kësaj kanë marrë lëndime trupore, për çka janë detyruar të kërkojnë ndihmë në Qendrën Klinike Universitare të Kosovës.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.