Donald Trump dhe ata që e mundësuan atë janë për t’u fajësuar, që turma mësyu të mërkurën Kongresin Amerikan në Washington. Në një situatë të tillë ndërrimi i pushtetit duhet të vijë sa më parë, mendon Ines Pohl.
Shkruan gazetarja gjermane, Ines Pohl
Sulmet e Donald Trumpit ndaj sistemit demokratik arritën pikën kulmore. Deklaratat e tij të mërkurën herët që vazhduan të përsërisin komplotet e çuditshme se zgjedhjet që ai i humbi dy muaj më parë janë vjedhur, bënë që përkrahësit besnikë të bëjnë një tentativë për puç. Nuk ka dyshim që Trump është tërësisht përgjegjës që turma e besnikëve të tij, nacionalistë të bardhë, teoricienë të teorive komplotiste dhe të ashtuquajturit vigjilentët e internetit mësynë egërsisht kongresin. Shtetet e Bashkuara për breza me radhë kanë qenë fanari i shpresës kur vinte puna për të garantuar demokracinë dhe përmbylljen e tranzicionit të pushtetit, por Trump e kishte bërë të qartë për botën, se sistemi i SHBA është po ashtu i brishtë.
Ata që e mundësuan Donald Trumpin janë po ashtu fajtorë
Është mjaft thelbësore të vëresh, se ky problem nuk është krijuar nga Donald Trump dhe stili i tij bombastik. Ata që ia mundësuan Trumpit, që e zbusnin retorikën e tij si hiperbolë e zhurmë për median online janë fajtorë po ashtu. Kjo përfshin 12 senatorët dhe më shumë se 100 përfaqësuesit e Dhomës së Ulët të Përfaqësuesve që kanë rënë dakord, se zgjedhjet në nëntor nuk ishin legjitime (apo të paktën vunë në pikëpyetje rezultatin). Ata nuk bënë asgjë të ndalnin përroin e dezinformimit dhe kaosit. Republikanët bënin sehir kur presidenti në kufirin e autokratit kontrollonte partinë e tyre duke u bërë bashkëfajtorë që e lejuan atë të krijojë një qeveri, që punon vetëm për të dhe jo për njerëzit.
Në një kohë që po dukej, sikur po digjej demokracia në Kongresin Amerikan, presidenti Trump qëndronte i ulur në Oval Office, duke parë në televizion shkatërrimin që inicioi. Atij iu deshën orë, derisa të bënte një deklaratë, duke iu lutur me mirësjellje turmës së tij të ishte “paqësore”. Trump bëri shumë pak përpjekje për të kontrolluar situatën, kur iu tha atyre, se në fakt ai “loves”- i do ata dhe beson, se ata janë “special”, të veçantë. Dhe kjo për një turmë, me një mungesë të tmerrshme respekti për demokracinë.
Vetëm pak ditë para dorëzimit të pushtetit, duket sikur Trump ka në plan të shkatërrojë çdo gjë dhe bashkë me të edhe themelin e demokracisë. Ai ka filluar të fshikullojë disa nga mbrojtësit e tij më besnikë, si zëvendëspresidenti, Mike Pence. Trump e ka bërë të qartë se republikani i vetëm i mirë është ai që e mbron atë deri në fund. Ky stil gjuhësor është bërë model në median konservatore dhe median sociale, dhe ka çuar në atë që pamë të mërkurën në Uashington. Trump qartësisht nuk është i shqetësuar për republikën që drejton, dhe më shumë do ta linte atë të rrëzohej, nëse nuk do ishte ai lideri i saj.
Policia me dy standarde
Policia e Kongresit e ngarkuar me detyrën e mbrojtjes së të dy dhomave të Kongresit, anëtarët e saj dhe qindra punonjës brenda ndërtesës dështoi në përmbushjen e detyrës së saj. Dhunuesit hynë më së shumti brenda të pakontrolluar, ndërkohë që mësynë senatin, thyen dritare dhe madje shkelën edhe në zyrën e kryetares së kongresit, Nancy Pelosi. Ata u lejuan të qëndrojnë në shkallët e kongresit më së shumti pa asnjë incident.
Më herët vitin që kaloi, kur protestuesit e Black Lives Matters marshuan nëpër qytetin e Uashingtonit u përballën me gazin lotsjellës, shkopinjtë e gomës dhe një president të zemëruar që thërriste të viheshin pas hekurave protestuesit paqësorë, në një kohë që ata ushtronin të drejtën e tyre bazë. Duket si një standard i dyfishtë: Nëse je i bardhë dhe mbështet Trumpin, je një patriot. Nëse jo, je një anarkist i rrezikshëm që nevojitet të largohet me gaz lotsjellës e të vihet pas hekurave.
Ne po shohim aktin final të një presidenti që ka kohë që i ndez për dhunë ata që janë besnikë të tij. Dorëzimi i pushtetit Donald Trump tek administrata e Joe Bidenit duhet të vijë sa më shpejt.
Ky opinion fillimisht është publikuar në Deutche Welle. Këtë op-ed e ka publikuar edhe në Twitter.
Ines Pohl është gazetare gjermane
