Pavarësisht thirrjeve të Institutit Kombëtar të Shëndetësisë Publike të Kosovës dhe Ministrisë së Shëndetësisë për ta ruajtur distancën si masë parandaluese kundër përhapjes së koronavirusit, një gjë e tillë nuk po respektohet.

Madje thyerjen e rregullave po e bëjnë edhe zyrtarët shtetëror, shkruan Gazeta Sinjali.

Deputeti i Nismës Socialdemokrate të Kosovës, Haxhi Shala, përmes një fotografie në rrjetin social Facebook ka treguar se ka qenë i ftuar në një iftar mbrëmjen e së shtunës.

Iftari ishte i organizuar në fshatin Kleçkë të Komunës së Malishevës, ku deputeti Shala ishte i pranishëm bashkë me një grup bashkëluftëtarësh.

“Iftar me bashkëluftëtarët në Kleqkë, në Odën e UÇK-së”, ka shkruar Sadri Shala, në Facebook, postimin e të cilit e ka shpërndarë edhe deputeti i Nismës, Haxhi Shala.

Ndryshe, përveç këtij rasti, edhe gjatë mbrëmjes së djeshme në Pejë, saktësisht në lagjen “Dardania” janë tubuar afro 30 presona për iftar, por policia ka intervenuar duke i shpërndarë./GazetaSinjali/