Koordinatori për menaxhimin e krizës nga tërmeti, Bledi Çuçi, ka treguar shifrat e dëmeve të evidentuara deri më tani në zonat e prekura nga tërmeti i 26 nëntorit.

Në mbledhjen e sotme të Këshillit të Ministrave të Shqipërisë, Çuçi deklaroi se në Tiranë janë 525 pallate dhe 3100 banesa të dëmtuara. 

Sa i përket akomodomimit të njerëzve të prekur nga tërmeti, ai tha se janë 4 mijë persona në hotele dhe 2054 në palestër, ndërsa 26 persona vijojnë të jenë të shtruar në spitale.

“6500 persona janë në çadra dhe 390 në qendra sociale. 12 pronarë në Durrës kanë shprehur gatishmërinë për rikuperimin e dëmeve”, deklaroi Çuçi.

Sa i përket objekteve shkollore, 36 shkolla janë vlerësuar me dëme të rënda, 9 prej të cilave janë në Tiranë. 

Çuçi tha se vijojnë të vijnë ndihmat nga Turqia, Kosova, Mali i Zi dhe Kroacia ndërsa çdo ditë po vijnë grupe ekspertësh për të parë gjendjen e ndërtesave./Gazeta Sinjali/