Policia e Kosovës dje ka arrestuar grupin prej pesë persona të dyshuar për vjedhje të rëndë në Ferizaj. Më 3 nëntor të këtij viti ata kishin kryer një vjedhje në një shtëpi, ku kishin marrë 36 mijë euro dhe stoli në vlerë të 8 mijë eurove.

“Pas hetimeve intensive, hetuesit policor të sektorit rajonal të hetimeve Ferizaj, kanë arritur që të identifikojnë pesë persona të dyshuar për kryerjen e  veprës penale  të  “Vjedhjes së rëndë”, rast ky i  ndodhur me datë 03.11.2019  në fshatin Sazli të Ferizajt. Hetuesit policor gjatë zhvillimit të procedurës hetimore, kanë siguruar prova të mjaftueshme lidhur me kryerjen e kësaj vepre penale”. 

“Të dyshuarit, A.XH. (m/sh/k 19 vjeç),  A.M. (m/sh/k  16 vjeç), I.M. (m/sh/k 30 vjeç ) , A.TH. (m/sh/k 24 vjeç) dhe A.TH. (f/sh/k/ 30 vjeçare,  më datën 03.11.2019,në bashkëveprim, me forcë kanë depërtuar në  shtëpinë e viktimës A.M. nga ku kanë vjedhur 36.000 euro dhe stoli ari në vlerë 8.000 euro”, thuhet në njoftim.

Më tutje po ashtu thuhet se Policia e Kosovës ka gjetur një sasi të të hollave të vjedhura të cilët të dyshuarit i kishin ndarë mes vete.

“Gjatë hetimeve është gjetur një sasi e të hollave të vjedhura, të cilat i kishin ndarë mes veti, si dhe të dyshuarit kanë pranuar se stolitë e arit i kanë shitur. Gjatë intervistimit  dhe  në prani të avokatëve mbrojtës, të  dyshuarit kanë pranuar në tërësi veprën e kryer”.

“Ndaj katër të dyshuarve, në konsultim me prokurorin e shtetit është caktuar masa e ndalimit për 48 orë, ndërsa ndaj të dyshuarit të mitur 24 orë”, thuhet në njoftimin e Policisë së Kosovës./Gazeta Sinjali/