Gjykata Themelore në Mitrovicë të akuzuarës për mashtrim me viza, Valbonë Peci, ia ka zëvendësuar masën e paraburgimit me masën e arrestit shtëpiak.
E akuzuara Peci ngarkohet se gjatë vitit 2020 dhe 2021, nga 29 persona ka pranuar 61 mijë e 600 euro, të cilëve iu kishte premtuar rregullimin e vizave suedeze.
Në seancën e së mërkurës mbrojtësi i të akuzuarës Peci, avokati Armend Krasniqi i propozoi gjykatës që masa e paraburgimit ndaj të mbrojturës së tij, të zëvendësohet me ndonjë masë tjetër alternative të sigurimit të pranisë së të pandehurës në procedurë.
Ndërsa, këtë propozim nuk e kundërshtoi prokurori i rastit Sllobodan Bakiq, i cili i propozoi gjykatës që masën e paraburgimit ndaj të akuzuarës Peci ta zëvendësojë me masën e arrestit shtëpiak, raporton “Betimi për Drejtësi”.
Ndryshe, Prokuroria Themelore në Mitrovicë, më 11 shkurt 2022, ka ngritur aktakuzë ndaj Valbonë Pecit sepse ekziston dyshimi i bazuar mirë se në Mitrovicë në raste dhe periudha të ndryshme kohore ka sjellë në lajthitje disa persona, me fshehjen e fakteve e me qëllim që vetes t’i sjell përfitim pasuror, e vetëdijshme për veprën dhe për pasojat e të njëjtës.
Sipas aktakuzës, disa persona në dëm të pasurisë së vet të pandehurës i kanë dorëzuar shuma monetare në mënyrë që e njëjta t’ju sigurojë vizën e punës në Suedi, gjë që nuk e ka bërë në afatet e dakorduara, sepse për një veprim të tillë nuk ka pasur bazë, mundësi dhe as autorizim.
Kështu, aktakuza thotë se nga 29 persona në intervale të ndryshme kohore gjatë vitit 2020 e 2021, sipas kësaj baze ka pranuar shuma monetare, në shumë kumulative prej 61 mijë e 600 euro.
