Juventusi dhe Interi do ta zhvillojnë derbin e madh italian të dielën mbrëma, shkruan Sinjali Sport.
‘Bianconerët’ e kanë nisur jashtëzakonisht mirë vitin 2022, duke mos humbur asnjë ndeshje të ligës që nga fundi i nëntorit. Në krejt formë të ndryshme po kalon skuadra e Interit të cilët kanë vetëm një fitore në shtatë ndeshjet e fundit.
Duke folur në një konferencë për shtyp sot, Allegri diskutoi fillimisht gjendjen e skuadrës së tij përpara Derby d’Italia.
“Ne do të shohim se si do të shkojë nesër, sot mund të them se po bëjmë mirë. Kemi kthyer Chiellinin, Bonucci do të jetë në stol, por ai është ende prapa, Zakaria dhe Alex Sandro janë kthyer. Pra, ne jemi pothuajse të gjithë në formë dhe të aftë.”
Ai i dha mendimet e tij për Paulo Dybala me një buzëqeshje.
“Nesër do të luajë Dybala, kështu që të gjithë jeni të lumtur dhe mund të shkruani tituj për këtë. Nuk më ka marrë malli në këtë pauzë, nuk të kam parë prej 20 ditësh!”, është shprehur italiani.
Allegri ka folur për disa lojtarë që do të startojnë nesër kundër Interit.
“Alex Sandro po, Zakaria duhet ta shoh. Chiellini është mirë dhe do të luajë”, ka shtuar ai.
Ai nuk ishte i sigurt se cilët ishin favoritët për Scudetto këtë sezon, me vetëm një pjesë të vogël të pikëve që ndanin tre të parët.
“Është e vështirë të thuhet se kush është favorit, mendoj se Interi, së bashku me Napolin dhe Milanin, janë ndër kandidatët për të fituar Scudetton. Nesër do të duhet të bëjmë një paraqitje të shkëlqyer përballë kampionëve italianë, për t’i mundur ata dhe për të konsoliduar vendin e katërt. Ne barazuam në Milano, humbëm në Superkupë, ndoshta nesër do të jetë radha jonë”, ka përfunduar Allegri.
