Valët e temperaturave të larta po shndërrohen në një kërcënim gjithnjë e më të madh për shëndetin publik në Zvicër, me personat e moshuar që konsiderohen grupi më i rrezikuar.
Sipas analizave të fundit, ditët me vapë ekstreme lidhen me rritje të ndjeshme të vdekshmërisë, veçanërisht te personat mbi moshën 75-vjeçare. Ekspertët paralajmërojnë se të moshuarit janë më të ekspozuar ndaj pasojave të nxehtësisë, për shkak të rrezikut më të lartë për dehidratim, goditje nga nxehtësia dhe përkeqësim të sëmundjeve ekzistuese kardiovaskulare dhe të frymëmarrjes.
Me plakjen e vazhdueshme të popullsisë në Zvicër, autoritetet shëndetësore vlerësojnë se ndikimi i valëve të të nxehtit mund të rritet edhe më shumë në vitet e ardhshme.
Qytetarëve, veçanërisht të moshuarve dhe familjarëve të tyre, u është bërë thirrje që gjatë periudhave me temperatura të larta të marrin masa mbrojtëse, përfshirë konsumimin e mjaftueshëm të lëngjeve, shmangien e qëndrimit në diell gjatë orëve më të nxehta dhe qëndrimin në ambiente të freskëta.
Problemi i temperaturave ekstreme nuk prek vetëm Zvicrën. Në valët e fundit të të nxehtit në Evropë, disa shtete kanë raportuar mijëra raste të vdekjeve shtesë, ku shumica e viktimave kanë qenë persona të moshuar.
Ekspertët theksojnë se përballimi i valëve të të nxehtit kërkon masa të koordinuara nga institucionet dhe kujdes të shtuar për grupet më të cenueshme të shoqërisë.
Sinjali – aty ku e vërteta flet para lajmit!
