Kryetari i Lidhjes Demokratike të Kosovës, Lumir Abdixhiku ka reaguar pas rekomandimit të IKShPK-së për presidenten Osmani për shtyrje të zgjedhjeve.
Abdixhiku ka shkruar se IKSHPK u shndërrua sot në instrument të pushtetit, shkruan Gazeta Sinjali.
“IKSHPK u shndërrua sot në instrument të pushtetit dhe me këtë humbi secilin kredibilitet. Skenari i paralajmëruar televiziv nga partia në pushtet, po ekzekutohet nga aktorë në shërbim të politikës instrumentalizuese”, ka shkruar ai.
Tutje i pari i LDK-së, ka thënë se rekomandimi i IKSHPK-së u dha me porosi ashtu siç po i duhet pushtetit.
“Trupat e kapur me vullnet apo presion pa dallim në vend të shëndetësisë, kanë vendosur të merren me politikë. Rekomandimi nuk u kërkua por u dha me porosi. Ashtu siç e paralajmëroj ditë më parë pushteti, ashtu siç po i duhet sot pushtetit”, ka shkruar Abdixhiku.
Ai ka theksuar se Kosova ka mbajtur zgjedhje në pandemi dhe se vendet fqinje po mbajnë zgjedhje tani.
“Një ditë zgjedhje për demokracinë është e paalternativë. Fushata është shkurtuar; KQZ është e përgatitur; data e zgjedhjeve nuk mund të ndryshojë. Të kujdesemi për shëndet, të japim shembull, të organizojmë një proces fer – por proces me 17 tetor do të ketë. Frikën e pushtetit për dështimin masiv, s’mund ta shërojmë; por demokracinë, lirinë e votës suaj, do ta mbrojmë”.
