Zvicra ka regjistruar temperaturën më të lartë të matur ndonjëherë gjatë muajit qershor, pasi termometri arriti në 38 gradë Celsius në qytetin e Bazelit, duke thyer rekordin e mëparshëm prej 36.9 gradësh të vendosur në vitin 1947.
Sipas MeteoSwiss, kjo është hera e parë që temperaturat në Zvicër tejkalojnë pragun prej 37 gradë Celsius gjatë muajit qershor. Rekordi i ri u regjistrua në të njëjtin stacion meteorologjik në Bazel ku ishte shënuar edhe rekordi historik i vitit 1947.
Për shkak të valës ekstreme të të nxehtit, autoritetet kanë mbajtur në fuqi nivelin më të lartë të alarmit për vapë në pjesën më të madhe të vendit.
Meteorologët u kanë bërë thirrje qytetarëve të shmangin qëndrimin e zgjatur në diell, të konsumojnë sa më shumë lëngje dhe të tregojnë kujdes të veçantë për grupet më të rrezikuara, përfshirë fëmijët, të moshuarit dhe personat me probleme shëndetësore.
Sinjali – aty ku e vërteta flet para lajmit!
