Zëvendësministri i Arsimit, Shkencës, Teknologjisë dhe Inovacionit, Dukagjin Pupovci është duke raportuar para Komisionit për Mbikëqyrjen e Financave Publike.
Pupovci është duke raportuar lidhur me raportin e auditimit për pasqyrat financiare vjetore të ministrisë, shkruan Gazeta Sinjali.
Kryetarja e Komisionit, Hykmete Bajrami tha se disa nga gjetjet janë për blerjen e librave në vlerë prej 2.1 milionë euro, keq-klasifikimi i shpenzimeve, pagesa e 32 pjesëtarëve serbë pa ardhur në punë.
“Pagesa e 32 zyrtarëve pa evidencën e vajtje-ardhje”, tha ajo.
Ndërsa, sipas Pupovcit nga 32 prej tyre, vetëm me tre kanë arritur që të kontaktojnë.
“Ne kemi hartuar një plan veprimi dhe në momentin e dorëzimit me 23 të gjetjeve, nëntë kanë qenë të zbatuara, ndërsa të tjerat janë në proces. Po e pranoj qe ka edhe dobësi që janë të karakterit arsimor, sepse ne kemi gjashtë universitete publike dhe e ngarkon shumë sistemin tonë financiar. Ne kemi propozuar që këto universitete të pavarësohen. Në lidhje me 32 punonjësit, vërtetë kemi pasur shumë vështirësi. Kemi provuar të kontaktojmë telefon, vetëm 3 janë përgjigjur”, ka thënë Pupovci.
Gjithashtu, ai ka bërë të ditur se në këtë muaj pagat do t’i qesin në zero për arsye që punonjësit të paraqiten.
Më tej, Pupovci tha se këta 32 punonjës të ministrisë nuk kanë ndjekur konkurset publike dhe se të njëjtit kanë arsimim vetëm të shkollës së mesme.
Fehmi Zulfiu, udhëheqës i divizionit të financave ka folur për blerjen e teksteve me 2.1 milionë eurove.
“Nuk kanë dashur t’i deklarojnë se ministria nuk i ka paguar fondet. Ministria ka mbuluar obligimet dhe kemi vazhduar procedurat e negocimit. Sa i përket kodit të subvencioneve ka qenë një paguaje e fulbright, ka qenë një mos informim që ministria nuk ka qasje në BQK, aty ka qasje vetëm thesari dhe kështu ka ndodhur mbingarkimi prej 270 mijë euro”, u shpreh ai.
Auditori Qerkin Morina theksoi se ky raport ka gjetje më së shumti në kuptimin e menaxhimit financiar sa i përket ministrive.
“Gjendja vazhdon të përkeqësohet. Një vit më herët kanë qenë 14 rekomandime tash janë rritur 22, 5 prej tyre janë përsërit. Kjo është një neglizhencë e zyrtarëve…gabimet kur përsëriten rezultojnë me pasoja më të mëdha. Planin e veprimit jemi tu e analizuar, ekipet e kanë kry një pjesë të punës 2021 dhe jemi tu e testu nivelin e rekomandimeve se deri në çfarë shkalle janë zbatuar”, tha ai.
Morina nga zyrtaret e MASHTI-t, kërkoi që t’i shikojnë me kujdes rekomandimet dhe ta përmirësojnë gjendjen.
