Mësimi tërëditor në shkollat e Komunës së Prishtinës pritet të zgjerohet edhe gjatë këtij viti shkollor, ndërsa Drejtoria e Arsimit është në pritje të vlerësimeve nga shkollat për të përcaktuar numrin e institucioneve të reja që do të përfshihen në këtë model.
Drejtori i Arsimit në Prishtinë, Arianit Elshani, ka thënë se përvoja e deritanishme ka treguar se shumica e prindërve dhe mësimdhënësve janë të kënaqur me këtë mënyrë të organizimit të mësimit, por ka ende sfida që lidhen me hapësirat, aktivitetet jashtëkurrikulare dhe infrastrukturën.
Aktualisht, mësimi tërëditor zhvillohet në 12 shkolla, ndërsa gjatë dy javëve të ardhshme pritet të konfirmohet numri i shkollave që do t’i bashkohen këtij modeli.
Sipas Elshanit, zgjerimi i mësimit tërëditor kërkon investime shtesë, pasi shkollat përballen me mungesë hapësirash, nevojë për kuzhina e mensa, si dhe organizim më të mirë të aktiviteteve sportive e artistike për nxënësit.
Ai në një intervistë për EO ka theksuar se një nga sfidat kryesore ka qenë edhe ushqimi për nxënësit, për çka aktualisht Komuna e Prishtinës ka kontratë me Kuzhinën Qendrore, por sipas tij duhet të përmirësohet mënyra e përgatitjes dhe shërbimit të ushqimit.
Elshani ka vlerësuar se modeli i mësimit tërëditor mund të shërbejë si shembull edhe për komunat e tjera, ndërsa ka shtuar se përmirësimi i kushteve në shkolla mbetet prioritet për të rritur cilësinë e arsimit.
Sinjali – aty ku e vërteta flet para lajmit!
