Në bazë të vendimit të Qeverisë për masat shtesë anti-COVID, të gjithë punonjësit e sektorit publik në vend, pas datës 13 shtator, nuk do të mund të shkojnë në vendin e tyre të punës, nëse nuk e dëshmojnë se janë vaksinuar ose janë negativ në testet për COVID-19.
Vendimin e ka konfirmuar ministri i Shëndetësisë, Arben Vitia në mbledhjen e Qeverisë në të cilën u vendosën masat e reja kufizuese për parandalimin e pandemisë së COVID-19.
“Të gjitha institucionet publike dhe private janë të obliguara të punojnë vetëm me staf esencial deri më datën 13 shtator, me qëllim të ruajtjes së shëndetit publikë, pas kësaj date, punonjësit e institucioneve publike, të ndërmarrjeve publike, duhet të posedojnë një nga dëshmitë, si certifikata e vaksinimit apo testet përkatëse në mënyrë që të u lejohet hyrja në ambientet e punës”, tha Vitia.
Ministri paralajmëroi se kjo masë do të zgjerohet edhe në sfera të tjera.
“Kjo masë gradualisht do të përfshijë edhe shumë sfera të tjera të jetës ekonomike dhe sociale”, tha ai.
