Dy takime janë paraparë të mbahen brenda javës që po vije ndërmjet grupeve punuese të Lidhjes Demokratike të Kosovës dhe Lëvizjes Vetëvendosje. Nesër në orën 15:00 do të zhvillohet takimi LVV-LDK, në selinë e këtyre të fundit, takim pritet të mbahet edhe gjatë ditës së enjte, mëson Gazeta Sinjali nga burimet brenda LVV-së.

Takimi i nesërm vije pas atij të ditës së mërkurë, është vazhdimësi e përpjekjeve për koordinimin paraprak të qëndrimeve për arritjen e koalicionit të mundshëm qeverisës mes këtyre dy subjekteve politike.

“Në takimin e nesërm të pranishëm nga LDK do të jenë Lutfi Haziri, Avdullah Hoti dhe Lumir Abdixhiku ndërsa nga LVV, Glauk Konjufca, Besnik Bislimi dhe Albulena Haxhiu. Do të flitet për fushën e ekonimisë”, tha një burim i Gazetës Sinjali, brenda LVV-së.

Sipas të njëjtit burim, ditën e enjte do të mbahet takimi tjetër mes dy grupeve punuese aty do të flitet për temën e rendit dhe ligjit.

Ndryshe, pas takimit të fundit LDK-LVV, Lumir Abdixhiku ka shkruar në Facebook se takimi është u zhvilluar në frymë pozitive dhe me përafrim qëndrimesh për formatin e ardhshëm të qeverisë. “Diskutuam dhe për temat që qytetarëve tanë u japin një Kosovë të jetueshme”, është shprehur ndër të tjera ai. /Gazeta Sinjali/