Personat e shëruar që dalin pozitiv në testin PCR mund të hipin në avion pavarësisht testit PCR pozitiv nëse kanë konfirmimin mjekësor se janë shëruar dhe testin negativ antigjen jo më të vjetër se 24 orë.

Për njerëzit që janë shëruar nga infeksioni me COVID, testet PCR shpesh vazhdojnë të rezultojnë pozitive për javë të tëra, pavarësisht se personat në fjalë kanë kaluar tashmë infeksionin.

Kjo paraqet probleme për udhëtarët, pasi që ata, duke filluar 4 dhjetori duhet të paraqesin testin PCR negativ kur duan të hyjnë në Zvicër, transmeton albinfo.ch.

Tani, Zyra Federale e Shëndetit Publik (BAG) ka gjetur një zgjidhje për këtë problem.

BAG pra ka informuar kompanitë ajrore se njerëzit me problemin e përmendur mund të pranohen për të hipur në aeroplan pavarësisht testit PCR pozitiv nëse kanë një konfirmim mjekësor se janë shëruar dhe një test negativ antigjen të shpejtë që nuk është më i vjetër se 24 orë.

Kështu ka deklaruar dje Virginie Masserey, Shefe e Seksionit të Kontrollit të Infeksionit në Zyrën Federale të Shëndetit Publik.

Ditëve të fundit mediat kanë raportuar për problemet e shumta që hasnin personat e kategorisë së përmendur, me rastin e përpjekjes për tu kthyer në Zvicër. Disa prej tyre kanë mbetur disa ditë deri në një javë në vendet ku kishin udhëtuar, pikërisht për shkakun se testi u kishte dalë pozitiv edhe pse kanë kaluar infeksionin./GazetaSinjali/