Vendet anëtare të BE-së u dakorduan sot mbi tekstin e deklaratës me të cilin liderët e BE-së në një samit në Slloveni do të riafirmojnë mbështetjen e tyre unanime për perspektivën evropiane të Ballkanit Perëndimor, si dhe mbështetjen për procesin e zgjerimit, të bazuar në partnerët kredibilë reformues.

Kështu, fjala “zgjerim” ende gjeti vendin e saj në samitin që do të mbahet për dy ditë në Bërdo pranë Kranj, me “kushte” të qarta kur bëhet fjalë për kriteret politike dhe ekonomike që vendet kandidate duhet të përmbushin para se të bëhen anëtare, por gjithashtu me theksimin e rëndësisë së “forcimit të kapacitetit integrues dhe absorbues të anëtarëve të rinj” nga vetë BE -ja.

Pikat e tjera të deklaratës, 28 prej tyre, nuk ishin të diskutueshme për përfaqësuesit e shteteve anëtare të BE -së.

Ato trajtojnë rëndësinë e demokracisë, sundimit të ligjit dhe të drejtave themelore në Ballkanin Perëndimor, si dhe forcimin e shoqërisë civile dhe pluralizmit mediatik.

BE përsërit angazhimin dhe partneritetin e tij me rajonin kur është fjala për të luftuar COVID-19, veçanërisht përmes shpërndarjes së 2.9 milionë dozave të vaksinave.

Edhe këtë herë, BE do t’i thërrasë partnerët e Ballkanit Perëndimor të punojnë në bashkëpunimin rajonal, marrëdhëniet e mira fqinjësore dhe zgjidhjen e problemeve dypalëshe, me theks të veçantë në mbështetjen e dialogut midis Kosovës dhe Serbisë dhe pritjen e përparimit drejt normalizimit të plotë të marrëdhënieve midis dy shteteve.

Në pjesën e deklaratës që lidhet me Planin Ekonomik dhe të Investimeve, BE thekson se do të mobilizohen rreth 30 miliardë euro për rajonin në shtatë vitet e ardhshme, nga të cilat nëntë miliardë janë fonde të pakthyeshme dhe rreth 20 miliardë investime në rindërtimin dhe riparimin e Ballkanit Perëndimor.

BE thekson se vazhdon të mbështesë bashkëpunimin rajonal dhe u bën thirrje udhëheqësve të rajonit të krijojnë Tregun e Përbashkët Rajonal, të dakorduar në Sofje në vitin 2020.

Vëmendja e veçantë e investimeve të BE -së në rajon do të lidhet me Agjendën e Gjelbër, Planin e Veprimit për Transportin, heqjen graduale të romingut midis BE -së dhe Ballkanit Perëndimor, si dhe Agjendën e Inovacionit.

Kur bëhet fjalë për bashkëpunimin politik dhe të sigurisë përmes tekstit të dakorduar të deklaratës, partnerët e Ballkanit Perëndimor nxiten të lëvizin drejt “përafrimit të plotë me politikën e jashtme të BE”, të rrisin bashkëpunimin me BE për të luftuar dezinformatat dhe kërcënimet hibride, dhe të vazhdojë bashkëpunimin për migracionin dhe luftën kundër terrorizmit.

Në deklaratë thuhet se samitet e BE -së dhe Ballkanit Perëndimor do të bëhen të rregullta dhe se ai i ardhshëm është planifikuar për vitin 2022./Gazeta Sinjali/