I Dërguari i posaçëm i presidentit Donald Trump për dialogun Kosovë-Serbi, Richard Grenell, ka ftuar në një takim në Shtëpinë e Bardhë me 27 qershor, të dyja palët për të diskutuar për një marrëveshje finale.

Presidenti i Serbisë, Aleksander Vuçiq, ka thënë se pas kësaj date do të zhvillohen disa takime të rëndësishme për të cilat ka thënë se nuk mund të flasë, meqë thotë se kështu iu është kërkuar.

“Kam biseduar me Putinin dje, kemi pasur një bisedë të gjatë. Një ditë pas zgjedhjeve do të vie Lajçaku, dhe një ditë pas vizitës së Lajçak do të udhëtojë për në Moskë. Pas vizitës në Moskë do të duhet të pajtohemi për delegacionin që do të shkojë në Washington. Disa ditë më pas unë mendoj se do të kemi disa takime të rëndësishme për të cilat s’mund të flasim, sepse ata na kanë thënë neve kështu”, ka thënë Vuçiq, shkruan B92.

Ndërkohë, presidenti serb ka thënë se nuk do të ketë njohje të pavarësisë së Kosovës në prag të festës së Vidovdanit e cila festohet më 28 qershor, një ditë pas takimit në Washington.

“Kam turp të flasë rreth asaj që Serbia do ta njohë Kosovën në prag të Vidovdanit. Një gjë e tillë s’do të jetë temë diskutimi”, ka thënë Vuçiq.

Ai ka thënë se për Serbinë do të fillojë një periudhë e vështirë, e cila do të fillojë me arritjen e Lajcakut në Beograd./ Gazeta Sinjali/