Presidenti i Serbisë, Aleksandar Vuçiq, ka thënë se nëse ndodh që të përshpejtohet anëtarësimi i Kosovës në organizata ndërkombëtare, Serbia do të befasojë me përgjigjen dhe efikasitetin.
“Ditën që do të pranohen në ndonjë organizatë ndërkombëtare, do të thotë se e kanë përmbysur marrëveshjen e Washingtonit dhe atë ditë do të mësojnë emrat e disa vendeve që e kanë tërhequr njohjen e pavarësisë së Kosovës”.
Vuçiq tha se për shkak të krizës në Ukrainë, shumë e shohin si një mundësi për zgjidhjen e çështjes së Kosovës dhe se shumë duan pranimin e përshpejtuar të Kosovës në organizatat ndërkombëtare.
Këto komente Vuçiq i bëri gjatë një ngjarje në Leskovc kur u pyet se çfarë ndodhi me notën e protestës ndaj Turqisë.
Ai tha se Serbia ka hequr dorë nga dërgimi i një note proteste Turqisë për qëndrimin e kësaj të fundit rreth hyrjes së Kosovës në NATO.
“Kam pasë një takim me presidentin turk Recep Tayyip Erdogan. Ai sqaroi se çfarë tha, çfarë u përcoll dhe ne morëm vendimin që të mos e dërgojmë notën e protestës”, shtoi ai.
Presidenti i Turqisë Recep Tayip Erdogan, pas takimit me presidenten e Kosovës Vjosa Osmani, kishte deklaruar se Kosovën e llogaritë si pjesë të NATO-s dhe se për këtë nuk ka nevojë për të marrë leje nga askush.
