Presidenti i Serbisë, Aleksandar Vuçiq, tha mbrëmë se deklaratat e fundit të kryeministrit të Kosovës, Avdullah Hotit tregojnë se Prishtina nuk është e gatshme për kompromis në takimet e radhës në Washington dhe Bruksel, dhe se kërkesat e saj kanë të bëjnë kryesisht me njohje reciproke, të cilën ai tha se do ta refuzojë.

Gjatë një vizite në Bled, Vuçiq është pyetur nga mediat lidhur me mesazhet e dërguara nga Prishtina zyrtare se do të kërkojë njohje reciproke në takimin e Washingtonit më 4 shtator. Sipas tij, ajo që thotë kryeministri Hoti, në fakt është ajo që mendojnë si amerikanët, ashtu edhe evropianët.

“Trump na shkroi në një letër duke pritur njohjen e ndërsjellë. Mos u habisni, sepse ata (SHBA) e pranuan (Kosovën) 12 vjet më parë. Dhe tani taktikat e Hotit janë që dikush duhet të bëjë presion ndaj Vuçiqit, i cili do të duhet ta nënshkruajë nën presion të tmerrshëm nga bota dhe nga Evropa dhe kjo është sesi do t’i mbarojmë gjërat”, tha Vuçiq.

I pyetur për të komentuar faktin që ai tha se do të refuzonte të takohej me presidentin Donald Trump nëse kërkohet njohje e ndërsjellë, Vuçiq tha për veten se është “shumë i vogël të përcaktojë se ku do të vijë Trump dhe ku nuk do të vijë”.

“Unë nuk dua të pranoj oferta për njohje reciproke”, tha ai. /Gazeta Sinjali