Qytetarëve të cilëve shtëpitë iu mbushën me ujë për shkak të reshjeve të shiut gjatë këtyre ditëve në vend, u doli në ndihmë Forca e Sigurisë së Kosovës, shkruan Gazeta Sinjali.

Përmes një komunikate për media, FSK ka treguar se gjatë kësaj jave, ka evakuuar 120 qytetarë.

Prej tyre, sipas FSK-së, 55 janë dërguar për strehim në Aeroportin e Gjakovës.

“Pas vërshimeve  të para (06.01.2021), FSK-ja ka marrë masat për të vlerësuar situatën në teren, duke angazhuar Kompaninë për Operacione me Civil, në nivel vendi. Më datën 08.01.2021, janë pranuar kërkesat e para për mbështetje nga Komuna e Gjakovës,  përmes Institucioneve Qeveritare për t’i mbështetur autoritetet civile, për zhvendosjen dhe strehimin e 55 qytetarëve në Aeroportin e Gjakovës”, thuhet në njoftim.

FSK ka bërë të ditur se është intervenuar në fshatin Kuzmin të Fushë Kosovës ku janë shpëtuar tre qytetarë të cilët kishin mbetur të ngujuar në shtëpitë e tyre.

“Operacionet e FSK-së, kanë vazhduar edhe me 10, 11 e 12 janar, për t’iu dalë në ndihmë qytetarëve dhe institucioneve në përballimin e situatës emergjente. FSK-ja i ka dalë në ndihmë Policisë së Kosovës, në pengimin e  përmbytjes së objektit të Forenzikës të Policisë së Kosovës, ku janë angazhuar ekipet Xheniere të Gardës Kombëtare, gjithashtu kanë intervenuar edhe në Klinikën e Pulmologjisë në QKUK-së, ku kanë  penguar përmbytjen e objektit”, ka bërë të ditur FSK.

Në fshatrat Poklek, Shtrubullovë e Komoran janë shpëtuar 43 qytetarë të ngujuar. Ndërkohë, tre të ngujuar të tjerë u shpëtuan nga FSK në fshatin Volljakë të Klinës.

“Njësitet e Kërkim – Shpëtimit në ujëra, me datën: 11.01.2021, gjatë ditës dhe natës kanë vepruar në rajonin e Drenasit, në fshatrat Poklek, Shtrubullovë e Komaran, ku kanë shpëtuar 43 qytetarë të ngujuar në shtëpitë e tyre. Ekipet e Kërkim Shpëtimit, po këtë ditë, kanë shpëtuar dhe evakuuar 3 banorë të fshatit  Volljak të Klinës”, thuhet në komunikatë.

Në rajonin e Prizrenit FSK ka shpëtuar dhe evakuuar 16 persona.

“Më 12 janar, ekipet profesionale të FSK-së, kanë realizuar operacione të kërkim – shpëtimit edhe në komunën e Fushë Kosovës, Vushtrrisë dhe Prizrenit, ku kanë shpëtuar dhe evakuuar 16 persona”, thuhet në njoftim.

Si pasojë e vërshimeve ka pasur dëme edhe në infrastrukturën rrugore, ndërkaq FSK ka ngritur ura mobile për t’u dalë në ndihmë qytetarëve.

“Vërshimet kanë shkatërruar edhe infrastrukturën rrugore, ku janë dëmtuar disa ura. FSK-ja me ekipet e Xhenios, kanë bërë vlerësimin e urës së dëmtuar në fshatin Dobroshec të Drenasit dhe urës në fshatin Hajnoc të Kamenicës, me qellim të ngritjes së urave mobile të FSK-së  për të mundësuar lëvizjen e lirë të qytetarëve”, thuhet në kumtesën e FSK-së./Gazeta Sinjali/