Universiteti i Gjilanit “Kadri Zeka”, përmes një komunikate dërguar mediave njofton se ka fituar projekt nga programi ERASMUS +, i cili kap shifrën afro 1 milionë euro.

“Projekti QUADIC ka të bëjë me ndërkombtarizimin e universiteteve si dhe ngritjen e kapaciteteve për projektet ndërkombëtare, aplikuar si koordinator nga Universiteti “Kadri Zeka” në Gjilan në thirrjen e fundit të programit Erasmus +, duke u pranuar si i suksesshëm dhe do të financohet nga Komisioni Evropian në vlerë prej 991.381 Euro” thuhet në njoftimin e Universitetit.

Në komunikatë theksohet se “ky projekt do të jetë një mundësi e mirë për partnerët nga Kosova dhe regjioni që të rrisin kapacitetet e tyre në ndërkombëtarizim dhe në shkrim të projekteve ndërkombëtare, gjithmonë të ndihmuar nga partnerët Evropianë, si Universiteti i Nicës, Universiteti i Lubljanës, Universiteti Teknik i Sofjes dhe Universiteti i Perugias”.

“Universiteti “Kadri Zeka” është koordinator i projektit dhe ka gjithsejt 18 partner vendor, regjional dhe ndërkombëtar, që dëshmon edhe një herë se kapacitetet e UKZ-së janë të jashtëzakonshme marrë parasysh numrin e personelit që ka, duke argumentuar gjithnjë e më shumë se ndërkombëtarizimi dhe zhvillimi i projekteve janë fushat në të cilat jo vetëm UKZ por të gjitha universitetet e Kosovës duhet të punojnë dhe të orientohen për të arritur në standardet që kanë universitetet nga Unioni Evropian dhe në këtë mënyrë duke rritur edhe cilësinë në studime.

UKZ-ja viteve të kaluara është fokusuar në zhvillimin e bashkëpunimit ndërkombëtar dhe ndërtimit të partneriteteve në programe dhe projekte ndërkombëtare. 

UKZ si Universitet Publik, vazhdon të mbetet lider për bashkëpunim ndërkombëtar dhe zhvillim të projekteve në Kosovë.

Universiteti “Kadri Zeka” mbetet i përkushtuar në zhvillimin e bashkëpunimit ndërkombëtar dhe pjesmarrjes në projekte, duke kontribuar në rritjen e cilësisë dhe zhvillimit akademik të stafit akademik, administrativë dhe studentëve”, bëhet e ditur në njoftim. /Sinjali/