Në konferencën e fundvitit, kryeministri shqiptar Edi Rama u pyet nga gazetarët nëse do të çojë policinë në selinë e PD-së më 5 janar, kur është edhe afati i fundit ndaj Lulzim Bashës i vendosur nga Sali Berisha që ai të lirojë zyrën.
Rama u shpreh se kjo përballje është kthyer në qesharake dhe parashikoi që ajo ditë do të jetë estradë.
“Nuk kam lënë datë, por e kam në plan të merrem me leximin e Mujit dhe të Halilit dhe jo me temën e kullës së PD. Kjo u bë si legjendë kreshnikësh që do të përballen filan datë dhe të gjithë ne do të merremi me përballjen e tyre. Kjo është qesharake, marrëzi, por edhe pak si ajo shprehja çfarë të kërkosh do të gjesh. I shkoi jeta duke kërcënuar e luftuar për të marrë kryeministrinë, tani po luftojnë për të marrë selinë e PD. Qesharake, por edhe shumë keqardhje, me thënë të drejtën. Me një fjalë, përgatituni për estradë.”
