Presidenti i SHBA-së, Donald Trump, ka thënë se me shumë gjastë deri në fund të vitit do ta kenë një terapi apo një vaksinë kundër COVID-19.

“Dua të falënderojë shkencëtarët dhe hulumtuesit në të gjithë vendin dhe botën, të cilët funksionojnë si pararojë e përpjekjes sonë historike për të zhvilluar dhe dërguar në mënyrë të shpejtë trajtimet, e përfundimisht edhe vaksinën kundër Covid-19”, deklaroi presidenti i SHBA-ve në një event të mbajtur më 4 korrik, shkruajnë mediet amerikane.

“Ka më se të ngjarë që të kemi një terapi apo një vaksinë kundër koronavirusit shumë më herët sesa fundi i vitit”, shtoi tutje i pari i vendit.

Eksperti kryesor i sëmundjeve infektive në vend, Dr. Anthony Fauci, tha këtë javë që vaksinat potenciale kundër  COVID-19 do të hyjnë në studime klinike të fazës së vonë deri në fund të muajit, derisa të tjerat do fillojnë në gusht, shtator dhe tetor.

Lajmi vjen ndërsa Moderna Inc, e cila është në ballë të përpjekjeve të vendit për zhvillimin e vaksinave, përsëriti më herët gjatë ditës se do fillojnë testimin e 30 mijë personave këtë muaj./ Gazeta Sinjali/