Presidenti i SHBA-së, Donald Trump, tha të premten se Abu-Bilal al-Minuki, numri dy i ISIS-it në nivel global, është vrarë gjatë një operacioni të zhvilluar nga forcat amerikane dhe ato nigeriane.
“Sonte, me urdhrin tim, forcat e guximshme amerikane dhe Forcat e Armatosura të Nigerisë ekzekutuan në mënyrë perfekte një mision të planifikuar me kujdes dhe shumë kompleks për të eliminuar nga fusha e betejës terroristin më aktiv në botë. Abu-Bilal al-Minuki, numri dy i ISIS-it në nivel global, mendoi se mund të fshihej në Afrikë, por nuk e dinte se ne kishim burime që na mbanin të informuar për gjithçka që ai po bënte”, shkroi Trump në Truth Social.
Trump nuk e bëri të ditur në postimin e tij vendndodhjen e saktë të operacionit.
Al-Minuki, shtetas nigerian, ishte shpallur “terrorist global i përcaktuar posaçërisht” nga administrata e ish-presidentit Joe Biden në vitin 2023, sipas Regjistrit Federal të SHBA-së, raporton Reuters – transmeton Sinjali.
Trump, i cili më herët ka akuzuar Nigerinë se nuk po i mbron të krishterët nga militantët islamikë në veriperëndim të vendit, falënderoi qeverinë nigeriane për partneritetin në këtë operacion.
Nigeria mohon diskriminimin ndaj ndonjë feje, duke thënë se forcat e saj të sigurisë synojnë grupet e armatosura që sulmojnë si të krishterët ashtu edhe myslimanët.
SHBA-ja kishte kryer më herët sulme ndaj militantëve të lidhur me Shtetin Islamik në Nigeri gjatë muajit dhjetor. Që atëherë, Uashingtoni ka dislokuar dronë dhe 200 trupa për të ofruar trajnim dhe mbështetje me inteligjencë për ushtrinë nigeriane kundër kryengritjeve të lidhura me ISIS-in dhe Al-Kaedën, të cilat po përhapen në gjithë Afrikën Perëndimore.
Zyrtarët ushtarakë nigerianë kanë deklaruar më herët këtë vit se forcat amerikane po operonin vetëm në rol jo-luftarak.
Sinjali – aty ku e vërteta flet para lajmit!
