Tri raste të dhunës në familje janë raportuar gjatë 24 orëve të fundit në Kosovë, shkuan Gazeta Sinjali.
Rastet e dhunës në familje kanë ndodhur në kryeqytet, Gjilan dhe në Gjakovë.
Rasti i parë në Prishtinë ka përfunduar me arrestimin e një personi, pasi që i njëjti dyshohet se ka sulmuar fizikisht femrën me të cilën bashkëjeton. Lidhur me rastin, me vendim të prokurorit i dyshuari pas intervistimit është dërguar në mbajtje. Ngjarja dyshohet se ka ndodhur dje rreth orës 03:30.
Në rastin e dytë, sipas policisë një person dyshohet se ka sulmuar fizikisht gruan me të cilën bashkëjeton dhe më pas i njëjti është arrestuar nga policia. Ndërkohë, lidhur me ngjarjen i dyshuari është dërguar në mbajtje. Rasti dyshohet se ka ndodhur në mbrëmjen e të mërkurës në Gjilan.
Ndërkaq, rasti i fundit ka ndodhur në Gjakovë, ku Policia e Kosovës ka bërë të ditur se janë arrestuar dy burra dhe një grua pasi që të njëjtit dyshohet se kanë sulmuar fizikisht një grua tjetër. Si pasojë e këtij sulmi viktima ka pranuar tretman mjekësor, ndërsa të dyshuarit pas intervistimit në konsultim me prokurorin janë liruar në procedurë të rregullt.
