Raportuesi i Parlamentit Evropian për Kosovën, Riho Terras, ka reaguar ashpër ndaj deklaratës së ministres serbe Snezhana Paunoviq, duke e cilësuar atë si të turpshme dhe të dëmshme për procesin e dialogut të ndërmjetësuar nga Bashkimi Evropian.
Përmes një reagimi në platformën X, Terras citoi deklaratën e ministres serbe: “Po të isha në vend të Millosheviqit në vitin 1998, do ta kisha spastruar etnikisht Kosovën”, duke theksuar se një retorikë e tillë cenon seriozisht besimin mes palëve.
“Kjo e shkatërron seriozisht besimin në dialogun e lehtësuar nga BE-ja”, shkroi Terras.
Deklarata e Snezhana Paunoviq është adresuar zyrtarisht edhe te Bashkimi Evropian nga ambasadori i Kosovës në Bruksel dhe kryenegociatori, Agron Bajrami.
Sipas Bajramit, deklarata përbën shkelje të Marrëveshjes së Brukselit të vitit 2023 dhe dëmton rëndë dialogun, besimin dhe procesin e normalizimit të marrëdhënieve ndërmjet Kosovës dhe Serbisë.
Sinjali – aty ku e vërteta flet para lajmit!
