Dhjetëra gra të mbijetuara nga lufta në Bosnje në vitet 1992-95, kanë protestuar në Sarajevë, duke kërkuar që t’i hiqet çmimi Nobel shkrimtarit kontravers austriak, Peter Handke.

Ato u mblodhën para ambasadës suedeze në qendër të kryeqytetit boshnjak, duke bartur parulla që e krahasonin shkrimtarin Handke me kasapin serb, Sllobodam Millosheviq dhe vartësit e tij gjatë luftës në Bosnje, Radovan Karaxhiqin e Ratko Mladiqin, shkruan Gazeta Sinjali.

Të tre ish udhëheqësit serb u gjykuan për genocid dhe për krime tjera të luftës. Millosheviqi vdiq në vitin 2006 para përfundimit të gjykimit të tij, ndërsa Karaxhiq dhe Mladiq u dënuan dhe u burgosën përgjithmonë.

Shkrimtari 76-vjeçar ka kohë që është përballur me kritika për mbrojtjen e tij të fuqishme që ua bëri serbëve gjatë luftërave të viteve 1990. Ai madje kishte mbajtur një fjalim në funeralin e Millosheviqit në vitin 2006, duke e lavdëruar atë. /Gazeta Sinjali/