Në gjykimin ndaj Salih Mustafës janë tetë viktima pjesëmarrëse, kështu ka bërë të ditur përmes platformës online “Zoom”, Angela Griep, shefe e Informimit dhe Komunikimit Publik në Dhomat e Specializuara të Kosovës.
Griep ka dhënë informacione të përditësuara mbi zhvillimet e fundit lidhur me procedurat gjyqësore dhe veprimtaritë në këtë gjykatë.
Me çështjen gjyqësore ndaj Salih Mustafës, ajo bëri të ditur se të premten e kaluar, me 22 prill, ka dhënë dëshminë dëshmitari i trembëdhjetë i thirrur nga mbrojtja e Salih Mustafës që dëshmoi kryesisht në seancë publike.
Ajo ka thënë se Zyra e Prokurorit të Specializuar (ZPS) ka ftuar 13 dëshmitarë për të dhënë dëshmi në gjykatë dhe ka mbyllur paraqitjen e provave të saj me 4 shkurt të këtij viti.
“Mbrojtja filloi me paraqitjen e provave të veta me 22 mars dhe deri tani ka thirrur 13 dëshmitarë. Në bazë të Rregullores të Procedurave dhe Provave të DhSK-së, si prokurorisë edhe mbrojtjes u është dhënë mundësia për tu drejtuar pyetje dëshmitarëve të thirrur nga pala tjetër. Aktualisht ka 8 viktima pjesëmarrëse në këtë çështje dhe përfaqësohen si një grup i vetëm nga mbrojtësja e viktimave e mbështetur nga anëtarët e ekipit të saj ligjor”, ka thënë Griep.
Sipas saj, të hënën e shkuar, me 25 prill, trupi gjykues në çështjen Salih Mustafa nxori një urdhër me të cilin i kërkonte Ministrisë të Drejtësisë, të paraqes parashtrime të mëtejme lidhur me modalitetet e mundshme që viktimat të marrin kompensim, por njëkohësisht të mbeten anonim, në rast se do të ketë shpallje të fajësisë për Mustafën.
