Sekretari i Mbrojtjes së SHBA-së, Mark Esper, shkarkoi nga detyra shefin e Marinës Richard Spencer për shkak të një rasti disiplinor.

Shkak për largimin e Spencerit është bërë situata me pjesëtarin e Marinës, Edward Gallagher.

Gallagher, i cili është dënuar për daljen në fotografi me një kufomë, ka shkaktuar tensione mes presidentit amerikan, Donald Trump, dhe krerëve ushtarakë.

Ai duhet të përballet me një rishikim disiplinor, që mund ta privojë nga anëtarësimi në marinë.

Ka raporte të ndryshme se përse i është kërkuar Spencerit që të largohet. Esper tha se e ka humbur besimin te sekretari i Marinës, sepse bisedat e tij private me Shtëpinë e Bardhë bien në kundërshtim me pozicionin e tij publik.

Trump më herët ishte shprehur i pakënaqur me mënyrën sesi u zhvillua gjyqi i Gallagherit dhe la të kuptohet se kjo është arsyeja për shkarkimin e Spencerit.

Gallagher është akuzuar për therjen e një të burgosuri 17 vjeç të grupit militant Shteti Islamik dhe për faktin se ka hapur zjarr ndaj civilëve gjatë shërbimit në Irak në vitin 2017. Këto akuza ndaj tij u rrëzuan, dhe ai u dënua vetëm për foton me kufomën e të burgosurit të Shtetit Islamik.

Por javën e kaluar, Gallagher u njoftua nga drejtuesit e Marinës se do të përballet me një rishikim disiplinor, i cili mund të rezultojë me largimin e tij nga Marina. /Gazeta Sinjali/