Shefi i Zyrës së BE-së në Beograd, Emanuel Giaufret, ka thënë sot se emisari i BE-së për dialogun Kosovë-Serbi, Miroslav Lajçak, ka filluar vizitat e tij në Prishtinë dhe më pas edhe në Beograd në përpjekje për të gjetur një zgjidhje për çështjen e regjistrimit të automjeteve me tabela RKS. Giaufret ka thënë se Brukseli dëshiron të shmangë ndonjë krizë të mundshme në Kosovë.
Diplomati francez ka thënë se duhet të aktivizohen të gjitha kapacitetet për të gjetur një zgjidhje, meqë siç thotë ai fokusi duhet të jetë në bisedimet për marrëveshje finale gjithëpërfshirëse që do të ndihmojë qytetarët e të dyja shteteve të jetojnë më mirë.
“Ne do të vazhdojmë të punojmë shumë edhe me Beogradin edhe me Prishtinën, do të jemi në terren dhe do të punojmë për të gjetur një zgjidhje”, ka thënë Giaufret për Tanjug.
Ai përkujtoi se çështja e normalizimit të marrëdhënieve Kosovë-Serbi ka qenë gjithmonë një aspekt kyç i procesit të zgjerimit, duke shtuar se BE-ja është intensivisht e angazhuar në lehtësimin e dialogut.
“Mendojmë se është e rëndësishme që fillimisht të zgjidhen problemet e njerëzve në terren, por kemi parë edhe një sërë momentesh të vështira në muajt e fundit, për fat të keq. Natyrisht, ne duhet të shmangim krizat, duhet të shmangim shqetësimin dhe shqetësimin e jetëve të njerëzve nga këto kriza dhe duhet të vazhdojmë të punojmë drejt kësaj”, ka thënë ai.
“Ideja është të menaxhojmë krizat, kjo duhet bërë, por ne gjithashtu duhet të angazhohemi në arritjen e një marrëveshjeje gjithëpërfshirëse ligjërisht të detyrueshme për normalizimin e marrëdhënieve dhe të ndihmojmë Serbinë të përparojë në rrugën e saj drejt BE,” ka potencuar tutje Giaufret.
Në fund, Giaufret ka konfirmuar se Asociacioni i Komunave është ende lartë në agjendën e BE-së, duke theksuar se s’është i vetmi obligim i papërmbushur dhe “se një pjesë është përgjegjësi e Beogradit, e një pjesë e Prishtinës”.
“Por është e rëndësishme që të gjithë ta dinë se fakti që jemi vonuar me zbatimin nuk do të thotë se nuk duam të ecim përpara. Duhet të vazhdojmë të insistojmë në zbatimin e gjithçkaje për të cilën është rënë dakord”, ka përfunduar Giafuret.
